Soli Deo Gloria - Guði einum til dýrðar er yfirskrift Tónlistardaga Dómkirkjunnar sem nú eru haldnir í tuttugasta sinn. Víst er um að stór hluti þeirrar tónlistar sem við köllum sígilda er saminn undir þessu kjörorði enda flestir höfuðsnillingar tónbókmenntanna innblásnir trúarhita og gjarnan á launum hjá kirkjunni eða trúræknum auðmönnum.
En þannig er þetta víst ekki lengur. Nú sækja tónskáld stóran hluta launa sinna í opinbera sjóði og eru ekki trúræknari en gengur og gerist. En kirkjan er enn að störfum og hana vantar alltaf tónlist. Þess vegna var það sem forsvarsmenn Dómkirkjunnar með Martein H. Friðriksson dómorganista í fararbroddi efndu til fyrstu Tónlistardaga Dómkirkjunnar árið 1982. Markmiðið var og er að efla og kynna þá tónlist sem samin er guði til dýrðar og fólki til uppbyggingar.
Í þessu skyni er árlega fengið tónskáld til að semja verk fyrir Dómkórinn og aðra flytjendur og er það frumflutt í kirkjunni á upphafstónleikunum. Einnig er tónlistarfólki nær og fjær boðið að halda tónleika. Hátíðin er þannig skipulögð að hún hefst á setningarathöfn þar sem tónverk ársins er frumflutt og sömu helgi er hátíðarmessa þar sem sérstaklega er vandað til tónlistarflutnings. Næstu daga eru svo haldnir þrennir tónleikar og að þessu sinni bætist við ljóðakvöld.

Góðir gestir
Á þeim árum sem liðin eru frá því Tónlistardagar Dómkirkjunnar voru fyrst haldnir hafa öll helstu núlifandi tónskáld Íslands lagt Dómkórnum til tónverk en auk þess hafa þrjú erlend tónskáld, Norðmaðurinn Knut Nystedt, Tékkinn Petr Eben og Þjóðverjinn Siegfried Thiele, verið beðin að semja verk sem kórinn hefur frumflutt. Nokkur þessara verka voru sungin inn á hljómdisk sem Dómkórinn gaf út í tilefni af 200 ára afmæli Dómkirkjunnar árið 1996.
Að þessu sinni býður Dómkórinn gömlum kórfélaga til leiks. Þuríður Jónsdóttir söng með kórnum fyrir nokkrum árum en hún er nú búsett í Bologna á Ítalíu þar sem hún leggur stund á nám og tónsmíðar. Verk hennar heitir Rauður hringur og er samið fyrir kór og þrjá einsöngvara auk þess sem raftónlist er bætt við sönginn.
Gestir kórsins á tónlistardögum hafa komið víða að og úr ólíku umhverfi. Þar hafa verið tónskáld og organistar, innlendir og erlendir, kirkju- og barnakórar úr nágrannabyggðum og lengra að komnir, að ógleymdum söngvurum og öðrum tónlistarmönnum sem tekið hafa þátt í flutningi Dómkórsins á tónverkum, nýjum og gömlum.
Í þessum heimsóknum hafa skapast góð tengsl og kynni sem stundum hafa leitt til þess að kórnum hefur verið boðið að endurgjalda heimsóknina. Kórinn hefur því sungið víða um lönd og á mörgum stöðum innanlands. Ein slík ferð var farin haustið 1999 þegar kórnum var boðið að taka þátt í tónlistarhátið í Prag sem haldin var í tilefni af sjötugsafmæli Petr Ebens sem er eitt þekktasta tónskáld Tékka nú um stundir. Auk þess hefur kórinn heimsótt Danmörku, Þýskaland, Belgíu, Spán, Skotland og Ungverjaland.

Fjölbreytt dagskrá
Tónlistardagar Dómkirkjunnar þetta haustið hefjast sunnudaginn 28. október með hátíðarmessu í kirkjunni kl. 11. Þar flytur Dómkórinn undir stjórn Marteins H. Friðrikssonar Litlu orgelmessuna eftir Joseph Haydn. Síðar um daginn verður setningarhátíðin þar sem Alina Dubik syngur einsöng við undirleik Hrefnu Eggertsdóttur en hún leikur á nýjan flygil sem Dómkirkjan hefur eignast. Dómkórinn syngur verk eftir Mendelssohn og Fauré að ógleymdu verki Þuríðar Jónsdóttur sem áður er nefnt en í flutningi þess taka þátt einsöngvararnir Magnea Gunnarsdóttir, Anna Sigríður Helgadóttir og Guðlaugur Viktorsson.
Laugardaginn 3. nóvember heldur Marteinn H. Friðriksson orgeltónleika í kirkjunni og daginn eftir verða gestatónleikarnir. Að þessu sinni var ekki leitað langt eftir gestum heldur var tónlistarfólki sem býr í nágrenni kirkjunnar boðið að halda tónleika. Meðal þeirra sem þekktust boðið eru Kjartan Óskarsson, Hrefna Eggertsdóttir, Laufey Sigurðardóttir og Oddur Björnsson en fleiri munu eflaust bætast í hópinn.
Sunnudaginn 11. nóvember verður ljóðakvöld í Dómkirkjunni og þar verður heldur ekki farið út fyrir sóknina því Þórarinn Eldjárn skáld sem býr skammt frá kirkjunni hefur umsjón með ljóðakvöldinu og auk dómorganistans sem að þessu sinni leikur á sembal leikur annar nágranni kirkjunnar, Ragnheiður Haraldsdóttir, á blokkflautu en hún syngur raunar einnig með Dómkórnum.
Lokatónleikar Tónlistardaganna verða haldnir í Kristskirkju í Landakoti miðvikudaginn 14. nóvember. Þar flytur Dómkórinn tónlist eftir Benjamin Britten, Knut Nystedt, Hjálmar H. Ragnarsson og tónleikunum lýkur með kantötu nr. 172 Erschallet ihr Lieder sem er eitt af glæsilegustu verkum Jóhanns Sebastians Bachs. Einvalalið söngvara kemur til liðs við kórinn: Marta Guðrún Halldórsdóttir, Anna Sigríður Helgadóttir, Finnur Bjarnason og Ólafur Kjartan Sigurðsson. Undir þessum söng leikur svo kammersveit þar sem Zbigniew Dubik er konsertmeistari.

Greinarhöfundur: Þröstur Haraldsson.

Ummæli fjölmiðla um setningu Tónlistardaga
Jón Ásgeirsson
Jónas Sen

Dagskrá Tónlistardaga 2001