Tónlistardagar Dómkirkjunnar hafa verið haldnir árlega frá 1982 og hefjast nú laugardaginn 25. október. Þar leikur Marteinn H. Friðriksson nýtt orgelverk eftir Tryggva Baldvinsson sem hann samdi fyrir Tónlistardagana 2003. Einnig syngur Dómkórinn kórverk eftir breska tónskáldið Bob Chilcott, en hann verður tónskáld Tónlistardaga á næsta ári.
Árlega koma gestir erlendis frá á Tónlistardagana og í ár mun organleikarinn Guðný Einarsdóttir leika á orgel kirkjunnar, en hún stundar nú framhaldsnám í kirkjutónlist í Kaupmannahöfn.
Unglingakór Dómkirkjunnar fór í sína fyrstu tónleikarferð til Danmerkur sl. sumar og á tónleikum 9. nóvember flytur kórinn hluta af efnisskrá sumarsins ásamt nýjum viðfangsefnum.
Ljóðakvöld í umsjá sr. Hjálmars Jónssonar verður í safnaðarheimilinu þriðjudagskvöldið 11. nóvember. Þar gefst kærkomið tækifæri að hlýða á ljóðskáld lesa úr verkum sínum og milli atriða munu Ragnheiður Haraldsdóttir, Ólöf Sesselja Óskarsdóttir og Marteinn H. Friðriksson flytja barokktónlist.
Hápunktur Tónlistardagana verða tónleikar Dómkórsins í Neskirkju. Flutt verður stórbrotið tónverk Missa brevis eftir Zoltán Kodály. Er þetta í fyrsta sinn sem tónverkið er flutt á Íslandi.

Sjá dagskrá næstu daga

Heildardagskrá Tónlistardaga 2003

Heimasíða Tónlistardaga Dómkirkjunnar